Su cuccu - Unu manzanu unu cunillu essit dae domo a chircare frustinaca. Arribbat una janna ‘e muru e si nch’intrat in cussa domedda che mere, tottu contenta.
Janna ‘e muru - Ite bella domo! E non b’at nemmos!
Puzoneddu - Pómpia chi su mere at a ghirare luego...
Janna ‘e muru - Mudu tue! Commo custa est domo mea.
Su cuccu - Ghirat a domo su cunillu e b’accattat zente istranza.
Cunillu - Chie b’at inoche?
Janna ‘e muru - Bi so deo!
Cunillu - Tziedda bella, essie derettu dae domo mea!
Janna ‘e muru - Su locu est de chie si lu picat.
Su cuccu - Su cunillu e sa janna ‘e muru sichin a brigare, cadaunu zirande sa leze comente li torrat a contu.
Cunillu - Sa domo est sa mea.
Janna ‘e muru - Ammustràemi su papiru ube b’at iscrittu chi bois sezis su mere.
Cunillu - Custa domo fit de jaju meu e de babbu, chi l’at lassada a mimme.
Janna ‘e muru - E andamus a ube su zuze, tando!
Su cuccu - Su zuze est una gattu betza e agreste, chi los fachet accurtziare, nande chi sas uricras suas non sun prus bonas che unu tempus.
Gattu-zuze - Benie, benie, fizos caros, benie e accurtziàebos, ca sa betzesa m’at fattu surda.
Cunillu - In sa domo bi fippo prima deo e fintzas s’usu fachet leze!
Janna ‘e muru - Ma cando so intrada in sa domo non bi fit nemmos...
Gattu-zuze - Prus accurtzu... prus accurtzu... gnaun... (los aggarrat ambos)
Su cuccu - Gai sa janna ‘e muru e su cunillu, chi cherian pònnere a su zuze chistiones de leze, sun istaos collonaos dae una gattu, chi los at accontzaos a piachere suo. E deo naro a tottus: in d-una cuntierra est semper mezus chi sas partes si ponzan de accordu tra issas.