Su cuccu - Unu mariane, colande sutta un’argustu, biet bellos burdones de àchina e si los pómpiat incantau.

Mariane - Ite bellos burdones de àchina! E so famiu puru! Ite làstima... sun troppu in artu!
Puzone - Ih! Meda bi cheret! No ischis brinchiare?

Su cuccu - Su mariane provat a fàchere unu brínchiu, pro aggantzare s’àchina, ma non b’arribbat. Su puzone si la ridet.

Mariane - Abbisoca, chin d-unu brínchiu, resesso a mi picare cussu bellu burdone... (provat ma non bi la fachet)
Puzone - Aha..aha...su balente!
Mariane - Mudu tue! Si t’aggarro ti nche mànico in d-unu buccone!
Puzone - E prova a mi sichire a bolu, si podes!

Su cuccu - Su mariane non lu podet arrampanare chi unu puzone de pacu contu si facat beffe de issu... e provat a fàchere unu brínchiu prus artu.

Mariane - Custa borta a cussu burdone bi depo cròmpere, gai lia faco bíere a cussu mucconosu! (torrat a brinchiare, ma ... nudda)
Puzone - Aha!Hi hi... ite birgonza pro unu mariane chi si credet balente!

Su cuccu - Su mariane non la cheret dare binta a cussu puzone e bocat un’iscusa pro si nch’andare.

Mariane - Oh! Bio chi cust’àchina no est bona. Gai non mi piachet!
Puzone - Nara, nara.. ja mi los appo a biccare deo sos pupuiones prus maduros!

Su cuccu - Su mariane, pro non facher bíere chi non bi resissiat, at nau chi fit s’àchina chi non baliat. Gai e tottu si cumportan sos ómines: cando non resessin a bínchere dan sa curpa a sas cosas o a sos àtteros.