Su cuccu - Unu poleddu fit paschende in d-una tanca; ma, cando at bidu arribbare su lupu, s’est postu a toppicare.
Lupu - Bellu poleddu, proite ses toppicande?
Poleddu - I-ho... i-ho... tziu lupu! Brincande unu rubu m’est intrada un’ispina in su pede...
Lupu - Oh! Sos poleddos mi piachen a los pappare peri si sun toppos!
Su cuccu - Ma su poleddu non fit tontu, comente crediat su lupu, e s’aiat pessau su modu de lu trampare.
Poleddu - Prima de m’aggarrare tiramila cust’ispina...
Lupu - E proite?
Poledddu - Ca bos podies púnghere su murru.
Lupu - E bidimus custu pede...
Su cuccu - Ma, mentras su lupu fit chircande de bíere s’ispina, ite at fattu su poleddu?
Su poleddu - Biende la sezis s’ispina?
Lupu - Ammustra bene bene su pede...
Poleddu - Commo àrtzio su pede de prus... (l’iscudet unu càrchide)
Lupu - Ohi ohi su murru! Ohi sas dentes meas! Poleddu traitore!
Su cuccu - E gai su poleddu, tontu tontu, at collonau su lupu: chin d-unu càrchide l’at secau tottu sas dentes!
Poleddu - E ite crediabazes? Chi deo bos lassabo chenare chin sas cossas meas?
Lupu - Ma m’istat bene! Dae babbu aio imparau a fàchere su masellaju
Poleddu - E deo ja l’ischio...
Lupu - E oje, maccu, mi so postu a fàchere su duttore. Ohi ohi ohi!
Su cuccu - Su lupu non si lu pessabat chi unu molente esseret prus abbistu de issu. A bortas sa zente malinna credet chi sos àtteros sian tontos.