Su cuccu - Una die unu corbu biet colande unu paone, chin sa coa de chentu colores.

Corbu - Cra cra cra! Proite a tibe sas pinnas bellas coloradas e a mimme nono?
Paone - Ma... deo so naschiu gai!
Corbu - Cra... cra... no est zustu! A mimme non mi piachet a èssere nigheddu...

Su cuccu - Su corbu biet in s’erba pinnas ruttas dae sos paones... e ite fachet?

Corbu - Cra... cra! Custas pinnas de paone... aha! Commo mi las besto... e gai appo a èssere galanu deo puru! Cra... cra!
Unu corbu betzu - Maccu ses? Tue ses unu corbu, non podes èssere unu paone!
Corbu - Chin bois, gai lezos e ordinàrios, non bi cherjo istare prus... adiosu!

Su cuccu - Gai cussu corbu, chin sas pinnas de sos paones in sa coa, lassat sa zente sua pro andare a istare chin zente prus aristocràtica.

Corbu - Cra... cra! Paones, cumpanzos bellos, so bénniu a istare chin bois!
Paone - Tue ses unu corbu... e furajolu puru! Custas pinnas non sun sas tuas! Baetiche! (l’istratzan sas pinnas a pittuladas)

Su cuccu - Tando su corbu, tottu ispiliu e a conca bassa, si n-che torrat a ube sos corbos.

Corbu - Cra-cra! Cumpanzos corbos, so bénniu a istare torra chin bois...
Unu corbu betzu - Cra... cra... cra! Prima nos as isputziau... e commo, chi sos paones non t’an chérfiu, chircas a nois?
Àtteru corbu - Commo non ti cherimus prus! Cra... cra!

Su cuccu - Cussu corbu non l’at prus chérfiu nemmos; est abbarrau solu che cane. Gai finit chie non si cuntentat de coment’est e si cheret fàchere prus bellu e prus mannu chin sas cosas de sos àtteros!