Su cuccu - Sa chícala aiat cantau tottu s’istiu, mentras sas furmicas aian colau su tempus carrande granos de trídicu a sa cala, pessande a s’iberru.

Furmica - Carrae su trídicu, cumpanzas... carrae...
Chícala - Tziri-tziri... ma pompiatilas cussas maccas! Semper carrande cosa!
Furmica - Carrae a sa cala... a sa cala...
Chícala - Cussas furmicas no ischin mancu cantare! Tziri-tziri... tziri-tziri...

Su cuccu - Sas furmicas sichian a carrare trídicu e fenu a sa cala.

Furmica - A trabballare siat! Fortza!
Chícala - E deo mi la canto... tziri-tziri...tziri-tziri...
Furmica - Sichie a carrare... pessae a s’iberru!
Chícala - Cussas mancu si la godin sa bida! Tziri-tziri...tziri-tziri...

Su cuccu - Ma arribbat s’iberru e sa chícala, chi no at colliu nudda in s’istiu, commo est famia e andat a ube sa furmica a limusinare.

Chícala - Tzia furmica, a mi los dazes pacos granos de trídicu, ca so famia?
Furmica - E tue, ite as fattu in istiu?
Chícala - Deo appo cantau notte e die, ca appo una bella boche!
Furmica - E sichi a cantare tando!

Su cuccu - Sa chícala, mesu morta de gana, promittit de torrare su recattu chin s’interessu, ma sa furmica...

Chícala - Dazemila carchi cosa, a su mancu unu cantu de fenu...
Furmica - Si tue ti ses ispassiada cantande, commo ballatila s’anchedda!
Chícala - E fachíela sa caridade! Ja bos appo a torrare sa cosa chin s’interessu...
Furmica - E cando? Pejus pro tene si no as nudda. Baetiche!

Su cuccu - Gai sa chícala est morta abberu de gana. E deo naro a sos mandrones chi est mezus a trabballare si non cheren finire che sa chícala.