Chisthi erani dui fradeddi: Preddu era póbaru e Amedeu era riccu.
Lu póbaru abia tanti figliori, lu riccu non n’abia mancu unu. Paghissu lu póbaru mandaba li figliori a uni è lu riccu pa dalli calche cosa. Ma lu fradeddu riccu non li dazia nudda.
Una dì Preddu, disippiraddu, tz’esci da campagna e, andendi andendi, l’a fattu notti; tandu si tz’è azzaddu a un aiburu.
Versu la mezzanotti eddu intendi umbè di fragassu: erani tanti cani abbaggendi e tanti ommini; chilsti erani bandidi chi s’arréggini danantzi a un monti e dízini: “Àbbriddi Tigareddu”. S’abbri lu monti e tzi farani tutti drentu. Tandu dízini: “Tàncaddi Tigareddu” e lu monti si tanca. Da inghibi a un pogu n’éscini e dízini: “Tàncaddi Tigareddu” e lu monti si tanca.
Da ghi li bandiddi non si vidiani più, Preddu si ni fara dall’àiburu, tz’anda a lu monti e li dizi: “Àbbriddi Tigareddu” e lu monti s’abbri. Drentu eddu a visthu dinà in dugna cuzoru e tandu s’ha pienu tuttu di marenghi. Si n’esci da lu monti e a manzaniri tz’anda a la muglieri, tzocca la janna e li figliori àbbrini. - Preddu conta tuttu lu fattu a la muglieri e dizi: - No diddi nudda a nisciunu.
Ciama la figliora più manna e li dizi: -Vai a un’è to’ zia e dilli chi ti dógghia la cóibula.
La figliola tz’anda a un’è la zia e li dizi chi la cóibula li séivi pa vindì chisgina. -Pígliara - dizi la zia - ma torramira súbiddu.
Preddu e la muglieri misùrani tutti li marenghi e n’éscini dui cóibuli.
La zia abbaidda la cóibula e v’incontra un marengo. Cumenti è giuntu lu mariddu, Amedeu, vi l’a dadu a vidè.
Amedeu postha lu fraddeddu a campagna e li dizi: -Si no mi dì da indì ai buggaddu chilsti marenghi t’ammatzo.
Tandu Preddu l’a dittu tuttu.
Súbiddu Amedeu anda a chiddu logu cun un cabaddu. A mezzanotti vedi chiddi bandiddi andendi a lu monti: “Àbbridi Tigareddu” dízini e tz’èntrani. Candu éscini dízini: “Tàncaddi Tigareddu”- e si n’àndani.
Tandu puru Amedeu anda a lu monti e dizi: “Àbbridi Tigareddu” e tz’entra e s’a pienu tuttu di dinà. Dabboi non s’ammintaba più cosa dì. Cussì è ilstadu drentu a lu monti tutta la notti e la dì.
Candu so giunti li bandiddi e l’ani visthu, l’ani pigliaddu e l’ani liaddu, schuttu e isthranguraddu.