(Mimiu e Lillia s’addóbbian in sa pratta)
Lillia - Ello Mimi’! Ite ses fachende tue, bestiu de pirata?
Mimiu - Mi còmporo unu nabiu mannu a belas e mi ponzo
a fàchere su cursaru…
Lillia - Maccu ses? Mí chi non semus in Carrasecare!
Mimiu - Ma deo cherjo biazare e connòschere sas terras
a intundu de su mare nostru!
Lillia - Lassamus sas brullas! A lu fachimus unu biazu
in su Mediterràneu chin sos cumpanzos nobos?
Mimiu - Eja! Tottu paris!
Lillia - Prima podimus andare a sa Córsica, gai fachimus cuntentu a Matteu…
Mimiu - Tando a sas Baleares, gai cuntentamus a Columba…
Lillia - E appustis a sa Tunisia, pro Aziza, e a su Marocco, pro Nabil…
Mimiu - E a su Senegal puru, pro Saidù…
Lillia - Chin tottu custos cumpanzos semus in otto!
Mimiu - Ajo’! Andamus a chircare sas barcas… (essin)
(Mussi e Chica, chi fin ascurtande cubaos, intran)
Mussi - In otto?
Chica - Mimiu unu, Lillia duos, Luchia tres, Columba battor, Matteu chimbe, Aziza ses, Nabil sette, Saidù otto…
Mussi - E nois?
Chica - Eh! E nois?