(semus accurtzu a sa domo de tzia Tzitzerona)
Lillia - A l’ischis, Mimi’? B’at zente noba in su bichinau…
Mimiu - Pitzinnos a jocare chin nois?
Lillia - Nono! Una est tzia Tzitzerona, una fémina macca e benenosa…
Mimiu - Cumpannia alligra pro jaja tua!
Lillia - Mamea! E s’àtteru est Tziu Pirrone, un’ómine aschiosu,
semper a minetas.
Mimiu - àttera cumpannia bona pro jaju tuo!
Lillia - Non lu credo abberu! Ma… a b’andamus a los connòschere?
Mimiu - Eja! Andamus a pedire su mortu mortu, su pedi cocone,
su pane e binu…
(mutin a Tzia Tzitzerona chin sos pischeddos in manos)
Lillia - Tzia Tzitzerona! A si podet?
Tzitzerona - (s’affatzat) Chie est?
Mimiu - Salude! Semus bénnios pro su pedi cocone…
Tzitzerona - Su cocone bos lu do in conca! Pristos affora! Mala jana bos jucat! (lis curret iffattu e cussos fughin)
Lillia - Oddeu!
Mimiu - Est un’istria abberu!
(Mimiu e Lillia torran currende isalenaos)
Mimiu - Provamus chin Tziu Pirrone…
Lillia - Mamea! Deo non bi benzo!
Mimiu - Eh! No at a èssere issu puru che a cussa tzia!
(toccheddan a sa janna de Tziu Pirrone)
Mimiu - Salude, Tziu Pirro’, a nos lu dazes su pane e binu?
Pirrone - (s’affatzat) Su binu meu cheries? Su diaulu chi bos at cottu! Piricu! Piricu! Pòneli su cane iffattu!
(s’ intendet su cane appeddande; sos duos pitzinnos si nche fughin)
Lillia - Iterrore!
Mimiu - Dae, curre, curre Lilli’! (essin currende)