(s’issena est in sa cuchina de tzia Tzitzerona)
Chichina - Úffula! Commo benit sa mere e cumintzat a mi cumandare:
“Chichina fache sa pasta;
Chichina bae a sa posta;
Chichina artzia, Chichina fala;
Chichina goi, Chichina gai!
Non nde poto prus! Commo mi ghetto a tonta”
Tzitzerona - (intrat) Chichina, bae e coche su pane!
Chichina - Unu piricocco a su cane?!
Tzitzerona - T’appo nau chi su pane cheret fattu!
Chichina - Fàchere a brodu sa gattu?!
Tzitzerona - T’appo nau de pònnere su pane in su furru!
Chichina - Chin sa padedda a bos pistare su murru?!
Tzitzerona - Chin custa padedda lu pisto a tibe abberu su murru! Su pane, appo nau, bae derettu a lu còchere!
Chichina - Non mi deppo mòghere?!
Tzitzerona - Ma ite t’at picau oje? Ses tonta? Ses macca?
Chichina - Tonta e macca a mimme?
Tzitzerona - Ah! Tando ja mi cumprendes… ses solu mandrona! Ja ti la faco colare deo sa mandronia. Teh! Pica custa… e custa… e custa! (li dat una surra chin sa pala ‘e còchere)
Chichina - Ahi… ohi… ohi… ja so andande… curro derettu a còchere su pane! So currende… so currende… (essit currende)