Su cucu - Una die unu corvu bidet colende unu paone, chin sa coa de chentu colores.

Corvu - Cra cra cra! Proite a tie sas pinnas bellas coloradas e a mie nono?
Paone - Ma... eo so naschidu gai!
Corvu - Cra... no est giustu! A mie non mi piaghet a èssere nieddu...

Su cucu - Su corvu bidet in s'erva pinnas rutas dae sos paones... e ite faghet?

Corvu - Cra... cra! Custas pinnas de paone... aha! Como mi las besto...
e gai apo a èssere galanu eo puru! Cra... cra!
Unu corvu betzu - Macu ses? Tue ses unu corvu, non podes èssere unu paone!
Corvu - Chin bois, gai feos e ordinarios, non bi cherzo istare piùs... adiosu!

Su cucu - Gai cussu corvu, chin sas pinnas de sos paones in sa coa,
lassat sa zente sua pro andare a istare chin zente piùs aristogràtica.

Corvu - Cra... cra! Paones, cumpanzos bellos, so bénnidu a istare chin bois!
Paone - Tue ses unu corvu... e furajolu puru! Custas pinnas non sunt sas tuas! Baediche!
(l'istratzant sas pinnas a biculadas)

Su cucu - Tando su corvu, totu ispumadu e a conca bàscia, si che torrat a ue sos corvos.

Corvu - Cra... cra! Cumpanzos corvos, so bénnidu a istare torra chin bois...
Unu corvu betzu - Cra... cra... cra! Prima nos as ispucidu... e como, chi sos paones
non t'ant chérfidu, chircas a nois?
Àtteru corvu - Como non ti cherimus piùs! Cra... cra!

Su cucu - Cussu corvu non l'at piùs chérfidu neune; est abbarradu solu che cane. Gai finit chie non si cuntentat de coment'est e si cheret fàghere piùs bellu e piùs mannu chin sas cosas de sos àteros!