Su cucu - Unu corvu est apuddadu subra un'àrvure e giughet in su bicu unu cantu de peta furada. Arrivat unu mariani e, malignu, ite ordinzat?

Mariani - Ite puzone mannu chi sezis, Tziu Corvu!
Corvu - Cra... cra... cra... cra... (cràschiat sa bula).
Mariani - Si azis finas una bella boghe podides èssere su re de totus sos puzones!
Corvu - Ite so intendende! Cra... cra... (chin su bicu astrintu)

Su cucu - A su corvu li diat piàghere a èssere su re de totus sos puzones... ma...
comente podet fàghere intèndere sa boghe, chin sa peta in su bicu?

Mariani - E sezis galanu puru!
Corvu - Galanu so galanu abberu! (chin su bicu astrintu)
Mariani - Ite làstima chi sezis chene boghe!
Corvu - Custu mariani non la connoschet sa boghe mia! Cra... cra! (chin su bicu astrintu)

Su cucu - Su corvu non bi la faghet piùs a istare mudu: totus la devent intèndere sa boghe sua forte...

Mariani - E passéscia! Su re de sos puzones at a èssere s'astore...
Corvu - Ma eo già l'apo sa boghe... e bella puru! (aberit su bicu)
Cra... cra... cra... (e gai che li ruet sa peta)
Mariani - Ah! Crachiadu azis! (chin unu brincu agantzat sa peta a bolu)

Su cucu - Su mariani, chi at agantzadu sa peta, si la riet cuntentu e su corvu
cumprendet chi cussu l'at coglionadu...

Mariani - Tziu Corvu, sa boghe già l'azis, ma su cherveddu est tropu minudu pro unu re!
Corvu - Afrodderi chi non ses àteru! Macu eo a t'ascurtare! Cra cra cra!

Su cucu - Dae tando su corvu at imparadu a èssere piùs abbistu, piùs sàbiu.
Sa mantessi cosa podet capitare a sas pessones chi ascurtant sos bantos de sa zente fartza.