Su cucu - Unu mengianu unu cunillu essit de domu a circai pistinaga. Lompit una buca 'e meli e si nci intrat in cussa domixedda che meri, totu cuntenta.
Buca 'e meli - Ita bella domu! E no nc'est nisciunus!
Pilloneddu - Càstia chi su meri at a torrai luegus...
Buca 'e meli - Citiu tui! Imoi custa est domu mia.
Su cucu - Fúrriat a domu su cunillu e nci agatat genti stràngia.
Cunillu - Chini nc'est innoi?
Buca 'e meli - Nci seu deu!
Cunillu - Tziedda bella, essei luegus de domu mia!
Buca 'e meli - Su logu est de chini si ddu pigat.
Su cucu - Su cunillu e sa buca 'e meli sighint a certai, dognunu girendi sa lei comenti ddi torrat a contu.
Cunillu - Sa domu est sa mia.
Buca 'e meli - Amostaimí su paperi aundi nc'est scritu chi bosu seis su meri.
Cunillu - Custa domu fiat de ajaju miu e de babbu, chi dd'at lassada a mei.
Buca 'e meli - E andaus aund'e su giugi, insandus!
Su cucu - Su giugi est una gatu bècia e aresti, chi ddus fait acostai, nendi chi is origas suas no funt prus bonas comenti una borta.
Gatu-giugi - Benei, benei, fillus carus, benei e acostaisí, ca sa becesa m'at fatu surda.
Cunillu - In sa domu nci femu prima deu e fintzas s'usu fait lei!
Buca 'e meli - Ma candu seu intrada in sa domu no nci fiat nemus...
Gatu-giugi - Prus acanta... prus acanta... gnaun... (ddus afarrancat totu e is duus)
Su cucu - Aici sa buca 'e meli e su cunillu, chi boliant ponni a su giugi chistionis de lei, funt stétius cugliunaus de una gatu, chi ddus at aconciaus a prexeri suu. E deu nau a totus: in d-unu certu est sempri mellus chi is partis si pongant de acórdiu intra de issas.