Su cucu - Unu margiani, passendi asuta de unu barrali, bit bellus gurdonis de àxina e si ddus càstiat incantau.

Margiani - Ita bellus gurdonis de àxina! E seu famiu puru! Ita làstima... funt tropu in artu!
Pilloni - Ih! Meda nci bolit! No scis brincai?

Su cucu - Su margiani provat a fai unu brínchidu, po aciapai s'àxina, ma no nci lompit. Su pilloni si nd'ariit.

Margiani - Fortzis, cun d-unu brínchidu, arrenèsciu a mi pigai cussu bellu gurdoni... (provat ma no nci dda fait)
Pilloni - Aha... aha... su balenti!
Margiani - Citiu tui! Chi t'aciapu ti nci papu in d-unu buconi!
Pilloni - E prova a mi sighiri a bólidu, chi podis!
-
Su cucu - Su margiani no ddu podit baliai chi unu pilloni de pagu contu si fatzat befas de issu... e provat a fai unu brínchidu prus artu.

Margiani - Custa borta a cussu gurdoni nci depu lompi, aici si ddu fatzu biri a cussu mucosu! (torrat a brincai, ma ... nudda)
Pilloni - Aha! Hi hi... ita bregúngia po unu margiani chi si creit balenti!

Su cucu - Su margiani no dda bolit donai binta a cussu pilloni e bogat una scusi po si nd'andai.

Margiani - Oh! Biu chi cust'àxina no est bona. Aici no mi praxit!

Pilloni - Nara, nara... gei mi ddus apu a bicai deu is pibionis prus cumprius!

Su cucu - Su margiani, po no fai biri chi no nci arrennesciat, at nau chi fiat s'àxina chi no baliat nudda. Aici e totu faint is óminis: candu no arrennescint a binci donant sa curpa a is cosas o a is àterus.