Su cucu - Unu molenti fiat pascendi in d-una tanca; ma, candu at biu arribendi su lupu, s'est postu a atzopiai.
Lupu - Bellu molenti, po ita ses atzopiendi?
Molenti - I-ho... i-ho... tziu lupu! Brinchendi unu rú m'est intrada una spina in su pei...
Lupu - Oh! Is molentis mi praxit a ddus papai fintzas chi funt tzopus!
Su cucu - Ma su molenti no fiat tontu, comenti creiat su lupu, e si fiat pensau sa manera de ddu cugliunai.
Molenti - Prima de m'afarrancai tiraimindedda custa spina...
Lupu - E po ita?
Molenti - Ca si podeis pungi su bruncu.
Lupu - E bieus custu pei...
Su cucu - Ma, mentris su lupu fiat circhendi de biri sa spina, ita at fatu su molenti?
Su molenti - Biendi dda seis sa spina?
Lupu - Amosta beni beni su pei...
Molenti - Imoi ārtziu su pei de prus... (ddi tzacat unu cārcinu)
Lupu - Ohi ohi su bruncu! Ohi is dentis mias! Molenti traitori!
Su cucu - E aici su molenti, tontu tontu, at cugliunau su lupu: cun d-unu cārcinu dd'at segau totu is dentis!
Molenti - E ita si creestis? Chi deu si lassamu cenai cun is cōscias mias?
Lupu - Ma gei mi dexit! De babbu emu imparau a fai su macellaju...
Molenti - E deu gei ddu sciemu...
Lupu - E oi, macu, mi seu postu a fai su dotori. Ohi ohi ohi... ohi!
Su cucu - Su lupu non si ddu pensāt chi unu molenti fessit prus scidu de issu. A bortas sa genti malintragnada creit chi is āterus siant tontus.