Su cucu - Unu lupu, papendi petza, nci at ingúrtiu un'ossu. Imoi est disisperau, ca ddu portat in su gúturu.

Lupu - Ohi ...ohi... comenti fatzu cun cust'ossu in su gúturu? Chi no mi líbberu de custa cosa mi ndi mòrgiu!

Su cucu - Po fortuna passat una menga e, intendendi cussus tzúnchius, si firmat.

Lupu - Tzia Menga, bosu chi portais su bicu aici longu, mi ndi ddu bogais cust'ossu de su gúturu?
Menga - Ma... bosu no seis de bonu coru cun is àteras béstias. Po ita si depu agiudai?

Su cucu - Sa menga tenit arrexoni; ma su lupu, aici a tzúnchius, fait pena deaderus e promitit cosas mannas in càmbiu.

Lupu - Ohi ... ohi... po caridadi agiudaimí. Gei s'apu a donai una paga bona...
Menga - Chi est aici, si fatzu custa operatzioni ... (cun su bicu ndi ddi bogat s'ossu de su gúturu)

Su cucu - Sa menga dd'at donau agiudu mannu a su lupu e dd'at sarvau sa vida. Imoi benit su momentu po su lupu de pagai su dèpidu.

Menga - Imoi donaimí sa paga chi mi depeis...
Lupu - Seis faci de sola! Mi pedeis sa paga puru!
Menga - E sa prumissa?
Lupu - Torrai gràtzias chi seis bia, po ita no s'apu mussiau su tzugu!

Su cucu - E aici sa menga est abarrada cugliunada de su lupu. Su contu s'amostat chi is malintragnaus funt malus pagadoris.