Su cucu - Una dí su margiani at atopau sa cicogna e dd'at tzerriada a domu sua po ddi cumbidai sa cena.

Margiani - Ellus, Tzia Cicogna, aundi est andendi?
Cicogna - A passillai, e bosu?
Margiani - Deu seu andendi a domu. Chi beneis cun mei si cumbidu sa cena.
Cicogna - Cun prexeri!

Su cucu - Su margiani at postu in sa mesa duus pratus cun d-una minestredda de brodu.

Margiani - Bona custa minestredda! Si praxit?
Cicogna - Eh! Depit essi bona...
Margiani - Mi ndi prexu meda chi s'est pràxia!

Su cucu - Sa cicogna, chi no iat pótziu suciai nudda cun su bicu de su pratu, si dda boliat fai pagai a su margiani e dd'at tzerriau a domu sua, ponendi su papai in strexus artus e strintus.

Cicogna - Tziu Margiani, oi si cumbidu deu su pràngiu in domu mia.
Margiani - Cun prexeri!
Cicogna - Bona custa petza cun patata a cassola! Si praxit?
Margiani - (lingendi su strexu a foras) Eh! Gei ddu biu chi si praxit...

Su cucu - Su margiani nc'est abarrau mali; no si dd'abetàt una brulla aici de sa cicogna. S'incras, candu si funt atopaus, custa ddu boliat torrai a cumbidai...

Cicogna - Ellus, Tziu Margiani, nci torrais cras a domu mia, chi si cumbidu su smurzu?
Margiani - (arrennegau) Nossi! Gei mi bastat su cumbidu de ariseru!
Cicogna - Ita làstima! Gei si dda perdeis sa cosa bona. adiosu!

Su cucu - Su margiani fiat arrennegau deaderus: cussu pillonatzu ddu boliat cugliunai un'àtera borta! Ita bregúngia po unu margiani scidu che a issu! Custu contu si fait cumprendi una cosa: chini mali fait,
mali si depit abetai. E custu est fintzas unu díciu sardu antigu.