Unu merí de istadi, candu su meri si fiat faendi unu sonnixeddu, un’arritzoni e unu margiani, amigus coralis, biendi cussu stampu si nci funt intraus in sa bíngia.
- Ita bellus gurdonis de àxina!- at nau su margiani a s'arritzoni - Na’, smurzaus?
- Eja! - at nau s’arritzoni – seu deaderus famiu e calincunu pibioni mi ddu papu cun prexeri!
Abbramiu comenti a sempri, su margiani s’est prenu sa brenti de cuss’àxina bona, mentris s’arritzoni s’est cuntentau de pagus pibionis, timendi de no nci podi prus passai in su stampu cun d-una brenti grussa.
Candu su meri si nd’est scidau e at bistu cussus duus intruxus, s’est postu a abboxinai inchietu: - Imoi gei s’acònciu deu!
S’arritzoni si nc’est fuiu in pressi; ma su margiani, chi iat papau tropu, portàt sa brenti manna e no nci podiat passai prus in su stampu.
Insandus s’arritzoni dd’at intzullau a sa iscusi: - Fai finta chi ses mortu... ponití a brenti a susu e abarra firmu e citiu, sentza de àlidu...
Su massaju, candu dd’at bistu aici at nau: - Ah! Tui as papau aici meda chi ses crepau! Ma... deu no ndi bollu de béstias mortas innoi... ti nci fúliu a foras.
Arrennegau e schivi schivi, at pigau su margiani po sa coa... dd’at furriotau in s’ària comenti una tzacarredda e nci dd’at ghetau a foras de su muru.
Candu su margiani s’est agatau sarvu si nc’est fuiu.
Su meri, biendiddu biu, at abboxinau: - Maladitu, ma chi ti torru a biri no mi cugliunas prus... gei t’apu a connosci!
Su margiani, furriendisí, at bistu chi cuss’ómini portàt sa coa sua in is manus.
Candu est lómpiu aundi fiat s’arritzoni dd’at nau prangendi: - E imoi comenti fatzu? Cussu m’at a connosci luegus cun sa coa segada.
S’arritzoni si dd’at castiau pensamentosu e dd’at nau: - Abarra allirgu! Gei dd’arrangiaus sa cosa.
Pagu dis apustis s’arritzoni at tzerriau su margiani amigu suu e àterus margianis de su logu po una festa de giogus.
- Cali giogu eus a fai? - at domandau su prus giòvunu.
E s’arritzoni: - Su giogu de sa mola...
- Eja, eja! – Ant abboxinau totus – si praxit a curri a fúrriu!
S’arritzoni at acapiau beni is coas de totu is margianis a sa mola e at nau: - Prontus seis? Imoi partei e girai, girai lestrus!
Cussus ant incumentzau a curri a ingíriu de sa mola, prexaus che pasca.
Su margiani, sentza de coa, ddus castiàt tristu, tristu che sa noti, ca non podiat giogai cun issus.
- Prus lestrus! - At cumandau s’arritzoni.
Ma, tot’in d-una: - Is cassadoris! - at abboxinau s’aritzoni - Fueisí!
Totu is margianis, atzicaus, po si nci fuiri lestrus, ant tirau, tirau, tirau... e is coas funt abarradas atacadas a sa mola!
Insandus s’arritzoni at tzerriau s’amigu suu: - Beni! No timas! No fiat berus!
- No nci funt is cassadoris?! - At iscramau su margiani spantau.
- Nossi! - dd’at nau s’arritzoni - No nci funt cassadoris, ma imoi nci funt dexi margianis sentza de coa!